Friday 15th of December | २०७४ मङ्सिर २९ शुक्रबार

न्यूज अभियान
हरेक खबर विशेष खबर

‘दैजीमा औद्योगिक क्षेत्र र कैलालीमा विशेष औद्योगिक क्षेत्र’

न्यूजअभियान | प्रकाशित मिति : २०७४ मङ्सिर १५ शुक्रबार
newsabhiyan

–राजेन्द्रप्रसाद पनेरु

कञ्चनपुर, १५ मंसिर (रासस) ः पूर्वमन्त्री एवं नेकपा(एमाले) पोलिटब्यूरो सदस्य कर्णबहादुर थापाले राष्ट्र निर्माणको अभियान सञ्चालन गरी देशलाई समृद्ध बनाउनका लागि वाम गठबन्धनको आवश्यकता परेको बताउनुभएको छ ।

शुक्लाफाँटा नगरपालिका– ३ पिपलाडीमा निर्वाचन क्षेत्र नं २ ले आयोजना गरेको चुनावीसभालाई सम्बोधन गर्दै उहाँले वाम गठबन्धनको दुई तिहाइको सरकार गठन गरी देशमा राजनीतिक स्थायित्व, दीर्घकालीन विकास र रोजगारीको अवसर सिर्जना गरिने जिकिर गर्नुभयो ।

बन्द अवस्थामा रहेको औषधि लिमिटेड सञ्चालन गर्ने निर्णय आफ्नै पालामा भएको जिकिर गर्दै उहाँले भन्नुभयो, “अहिले नवीन्द्रराज जोशी मैले सञ्चालन गर्न लागेको भन्दै छन् । अर्थमन्त्री डा रामशरण महतसँग कुरा गरेर सरकारी लगानीका उद्योग खोल्नुपर्छ भनेर प्रक्रिया अगाडि मेरै पालादेखि अगाडि बढेको हो ।”
दैजीमा औद्योगिक क्षेत्र खोल्नका लागि प्रक्रिया अगाडि बढाइएको उल्लेख गर्दै उहाँले कैलालीमा विशेष औद्योगिक क्षेत्र(सेज) बनाउन राखिएको प्रस्ताव पनि वाम गठबन्धनले अगाडि बढाई सयौँ युवालाई रोजगारी दिने बताउनुभयो ।

“प्रदेश नं ७ मा वाम गठबन्धनको सरकार गठन भएमा खेलकुदमा नेपाललाई चिनाउनका लागि खेल विज्ञान विषयमा पढाइ प्रारम्भ गर्ने, खनिजशास्त्रको पढाइ सञ्चालन गर्ने र पाँच लाख बढीलाई रोजगारी दिई आत्मनिर्भर बनाउन चाहन्छौँ”, उहाँले भन्नुभयो । स्वस्थ्य समाज निर्माण गर्नका लागि योग शिक्षालाई अनिवार्य बनाइने र माथिल्लो कर्णाली, पञ्चेश्वर र पश्चिम सेती जलविद्युत् आयोजना सञ्चालन गरी प्रदेश नं ७ लाई विद्युत्मा आत्मनिर्भर बनाउन चाहेको उहाँले बताउनुभयो ।

सोही कार्यक्रममा निर्वाचन क्षेत्र नं २ मा प्रतिनिधिसभाका उम्मेदवार नरबहादुर धामीले वाम गठबन्धनको सरकार गठन भएमा समाजिक सुरक्षाभत्ताको रकम रु दुई हजारबाट रु पाँच हजारमा पु¥याई ज्येष्ठ नागरिकलाई सम्मान गरिने बताउनुभयो ।

प्रदेशसभाका उम्मेदवार लालबहादुर खड्काले प्रमाणपत्र धितो राखी विनाब्याज युवालाई ऋण उपलब्ध गराई रोजगार दिन र भोगचलन गर्दै आएको जग्गा बसेकै ठाउँमा नापनक्सा गरी जग्गाधनी पुर्जा उपलब्ध गराउन तत्पर रहेको बताउनुभयो ।

निर्माणाधीन पुल समयमा पूरा गरिने
वाम गठबन्धनबाट प्रतिनिधिसभा क्षेत्र नं ३ का उम्मेदवार डा दीपकप्रकाश भट्टले महाकाली नदीमा निर्माणाधीन चार लेनको पक्की पुलको डिजाइन संशोधन गरी तोकिएको समयमा पूरा गरिने बताउनुभएको छ ।

गठबन्धनले आज ब्रह्मदेवमा आयोजना गरेको चुनावीसभालाई सम्बोधन गर्दै उहाँले दोधारा–चाँदनीका बासिन्दालाई सिँचाइ सुविधा पु¥याउन पुलको डिजाइन फेरेर पश्चिमपट्टि ब्यारेज र हेड थप्ने प्रस्ताव गरिएको जानकारी दिनुभयो ।

“नेकपा (एमाले)का अध्यक्ष केपी शर्मा ओली प्रधानमन्त्री भएका बेलामा महाकालीको पुलका लागि बजेट विनियोजन गरिएको हो, अहिले निर्माण थालिएको छ” , उहाँले भन्नुभयो, “दोधारा–चाँदनीमा सिँचाइ सुविधा पु¥याउन डिजाइन फेर्ने कुरा गरिएको हो । नहर पनि लैजान्छौँ, तीन वर्षमा पुल पनि बनाउँछौँ ।” एकीकृत महाकाली विकास सन्धिअनुसार शारदा ब्यारेजबाट पाउनुपर्ने ३५० क्युसेक पानी दोधारा–चाँदनीले अहिलेसम्म नपाएकाले पुल पश्चिममा ब्यारेज बनाएर सिँचाइ सुविधा पु¥याउने कार्यसूची अघि सारिएको डा भट्टले बताउनुभयो ।

 

जीवनमा एक पटक कैलाश मानसरोवर पुग्ने इच्छा हुने सबैका लागि ब्रह्मदेव– टिंकर सडक सहज हुने भएकाले धार्मिक पर्यटक र आर्थिक व्यापार विस्तार गरिने उहाँको भनाइ छ ।


शहिद गौतमको सम्झनामा शालिक
निर्वाचन क्षेत्र नं १ मा वाम गठबन्धनका उम्मेदवार वीना मगरले पुनर्वासको आनन्द बजारमा भारतीय सुरक्षाकर्मीका गोली लागेर ज्यान गुमाएका गोविन्द गौतमको सम्झनामा शालिक बनाइने घोषणा गर्नुभएको छ ।

पुनर्वासमा आज आयोजित चुनावीसभामा उहाँले गौतमले राष्ट्र र राष्ट्रियताका लागि ज्यान दिएको उल्लेख गर्दै उहाँको वीरता विश्वभर चिनाउन शालिक बनाउने बताउनुभयो । उहाँले बेरोजगारी र गरिबी अन्त्यका लागि औद्योगिकीकरण गरिने तथा आरक्ष पीडित र लालपुर्जा नपाएकाका समस्या समाधान र सडकलाई हिलो र धुलोमुक्त गरिने प्रतिबद्धता व्यक्त गर्नुभयो ।


गठबन्धनबाट प्रदेशसभा सदस्य उम्मेदवार तारालामा तामाङले दक्षिणी क्षेत्रको विकास र समृद्धिका लागि वाम गठबन्धनलाई मत दिन आह्वान गर्नुभयो ।


न्यूज अभियान डट कमको एन्ड्रोइड एपका लागि यहाँ क्लिक गर्नुहोस् । हरेक खबर विशेष खबरका लागि अफिसियल फेसबुकट्वीटर मार्फत जोडिनुहोस् ।


न्यूज अभियान TV - ग्यालेरी

View All
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan