Wednesday 14th of November | २०७५ कार्तिक २८ बुधबार

न्यूज अभियान
हरेक खबर विशेष खबर

नेपालगञ्जको धार्मिक सद्भाव, मुस्लिमको निधारमा सप्तरङ्गी टीका

न्यूजअभियान | प्रकाशित मिति : २०७५ कार्तिक २३ शुक्रबार | (रासस)
newsabhiyan

– काशीराम शर्मा

बाँके, २३ कात्तिक : अब्दुल वाहिद मन्सुरी ‘चुन्ना’ मुस्लिम समुदायका व्यक्ति हुनुहुन्छ । नेपालगञ्ज उद्योग वाणिज्य सङ्घका प्रथम उपाध्यक्षसमेत रहनुभएका चुन्ना मुस्लिम भए पनि हिन्दूका हरेक चाडबाडमा रमाउने गर्नुहुन्छ । नेपालगञ्जका रैथाने चुन्नाले २० वर्षदेखि दशैँतिहारमा टीका लगाउँदै आउनुभएको छ ।

“यसपालि साइतको टीका लगाउन नपाइने भयो”, उहाँले भन्नुभयो, “यसपालि त टीका शुक्रबार परेकाले छ, १ बजे नमाज पढेर २ बजेतिर टीका लगाउन जान्छु ।” चुन्नाले नेपालगञ्ज–१, धम्बोझी निवासी पुनम सिंहको हातबाट टीका लगाउँदै आउनुभएको छ ।

“मैले जहिले पनि साइतकै टीका लगाएको छु”, उहाँले भन्नुभयो, “यसपालि शुक्रबार टीका परेकाले साइतमा लगाउन नपाइने भयो ।” आफूलाई सेल र फिनी रोटी अति नै मनपर्ने बताउँदै उहाँले स्कूल पढ्दादेखि नै छिमेकी एकजना बाहुन बाजेको घरमा फिनी र सेलरोटी पाक्दा खान जाने गरेको विगत सम्झिनुभयो ।

नेपालगञ्जको घरबारीटोल पहाडी समुदायको बाक्लो बसोबास रहेको बस्ती हो । त्यही बस्तीमा हुर्किएका चुन्नाले भन्नुभयो, “छिमेकी भनेका हरेक समस्या पहिला काम लाग्ने मान्छे हुन्, आफन्त त पछि आइपुग्छन् । यही सोचका साथ म पनि छिमेकी साथीहरु दुवै समुदायको पर्वमा रमाउन थालेँ ।”

स्कूल पढ्दा तिहारमा देउसी भैलो खेल्न जाने गरेको सम्झिँदै उहाँले भन्नुभयो, “मुस्लिम समुदायको चाड बकरइदमा हिन्दू साथीहरुलाई बोलाएर खुवाउने गरेको छु ।” चुन्नाले हिन्दू धर्मावलम्बीको चाडमा आफैँ खानपिन गर्नुहुन्छ । दशैँमा रामबागमा रहेको शक्तिको घरमा गएर चुन्नाले टीका लगाउनुभयो । “तिहारमा धम्बोझीमा गएर टीका लगाउँछु”, उहाँले भन्नुभयो ।

“म हलाल गरेको मासु खान्छु, त्यो कुरा उहाँहरुले बुझ्नुभएको छ, म दशैँ र तिहारमा जाँदा दिदीबहिनीले हलाल गरेकै मासु ल्याउनुहुन्छ । कहिले सिङ्गै कुखुरा ल्याउनुहुन्छ । म आफैँ काट्छु र बनाउन लगाउँछु”, चुन्नाले भन्नुभयो, “हाम्रो परिवार मुस्लिम र हिन्दू दुवैको चाडमा रमाउने गर्छ ।” हिन्दूहरुको पर्व भएकाले तिहारमा हिन्दू समुदायका मानिसको निधारमात्रै होइन, नेपालगञ्जमा मुस्लिम समुदायका व्यक्तिको निधारमा पनि सप्तरङ्गी टीका देख्न सकिन्छ ।

नेपालगञ्ज एउटा सद्भाव र सभ्यता बोकेको शहर हो । चुन्नामात्रै होइन, नेपालगञ्जमा रक्षाबन्धन, दशैँतिहारमा टीका लगाउनेहरु धेरै छन् । शहरी विकास मन्त्री मोहम्मद इस्तियाक राई पनि रक्षाबन्धन, दशैँ र तिहारमा टीका लगाएर रमाउँदै आउनुभएको छ । ब्रह्मकुमारी ईश्वरीय विश्वविद्यालयमा गएर उहाँले त्यहाँका दिदीहरुसँग टीका लगाउने गर्नुहुन्छ ।

हिन्दूहरुले दशैँको दुर्गा मूर्ति सेलाउन जाँदा मुस्लिम युवाले बाटोमा बसेर पानी बाँडेका थिए । ईदमा बिपीचोकमा मुस्लिम समुदायले सामूहिक नमाज पढेर बाहिर निस्किँदा हिन्दू युवाले पानी वितरण गरे । यो नेपालगञ्जको छुट्टै पहिचान हो । यहाँ हिन्दू, बौद्ध, मुस्लिम, शिख र इसाई मिलेर बसेका छन् ।

यहाँको विशेषता के हो भने मन्दिरमा घण्टी बजिरहँदा, मस्जिदमा अल्लाह अबकर भनिएको स्वर सुनिन्छ । शिखले वाहे गुरु भनिरहँदा बौद्धको मन्त्रोचारण गुञ्जायमान हुन्छ । हिन्दूहरु मन्दिर जाँदा मस्जिद भएर जानुपर्छ । मुस्लिमहरु मस्जिद जाँदा मन्दिरहरु भएर जानुपर्छ । हरेक दुई तीन सय मिटरको दूरीमा मन्दिर, मस्जिद, गुम्बा, गुरुद्वार रहेका छन् । 


न्यूज अभियान डट कमको एन्ड्रोइड एपका लागि यहाँ क्लिक गर्नुहोस् । हरेक खबर विशेष खबरका लागि अफिसियल फेसबुकट्वीटर मार्फत जोडिनुहोस् ।


न्यूज अभियान TV - ग्यालेरी

View All
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan