न्यूज अभियान
हरेक खबर विशेष खबर

काठमाडौं, १ साउन । नेपाली राजनीतिका दुई महागुरु नेपाली कांग्रेस र नेकपा एमालेको 'बिहे' नहुँदै डिभोर्सको संघारमा पुगेको छ।

हिजोसम्म "हामी त सात जुनीसम्म सँगै हिँड्ने हो" भन्दै कसम खाएका ठूला दलहरूको गठबन्धन आज बालुवाको महलझैँ गल्र्यामगुर्लुम ढल्ने निश्चित भएको छ।

संसद्‌मा राष्ट्रिय स्वतन्त्र पार्टी (रास्वपा) को 'नयाँ आँधी' ले केन्द्रबाट पत्तासाफ गराई बत्ती बालेर खोज्नुपर्ने स्थितिमा पुर्या एका यी पुराना खेलाडीहरू अझै पनि प्रदेशको सत्तामा भने 'हिक्क हिक्क' गर्दै प्राण थाम्न खोज्दैछन्। 

"केन्द्रमा जे सुकै होस्, प्रदेशको कुर्सीमा मेरो टाँसिएको फेभिकोल कसले उखाल्दो रहेछ हेरौँ" भन्दै ठूला नेताहरू यतिबेला लाजसमेत पचाएर पद जोगाउने अन्तिम कसरतमा छन्।

सातै प्रदेशमा पराकम्पन: सरकार ढल्ने 'हन्ड्रेड पर्सेन्ट' निश्चित !
केन्द्रमा अविश्वासको चिसो हावा चल्नासाथ त्यसको निमोनिया सातै प्रदेशका मुख्यमन्त्रीहरूलाई लागिसकेको छ। सुदूरपश्चिमबाट सुरु भएको 'भूकम्प' ले कोशी, बागमती र लुम्बिनीसम्मका जग हल्लाइसकेको छ।

सुदूरपश्चिम र बागमतीमा 'मरिहत्ते' को खेल: सुदूरपश्चिममा कांग्रेसका कमल शाहले एमालेका मन्त्रीहरूलाई गलहत्याएर निकाला गरेपछि बागमतीमा कांग्रेस नेतृत्वको सरकार ढाल्न एमालेका ६ जना मन्त्रीहरू 'पिलो निचोरेजस्तै' पीडाका साथ राजीनामा खल्तीमा हालेर हिँडेका छन्।

लुम्बिनी र गण्डकीको चटारो: लुम्बिनीमा एमालेको सरकार ढाल्न कांग्रेसका मन्त्रीहरू "म पनि के कम" भन्दै राजीनामाको लाममा उभिएका छन्।

केन्द्रमा जनताले लखेटिसक्दा पनि प्रदेशमा 'भागबन्डाको जुठो थाल' चाट्न पाउने आसमा दुवै दलका प्रदेश संसद्हरू मरिहत्ते गरिरहेका छन्। उनीहरूको यो छटपटी हेर्दा लाग्छ, "सत्ता नै यिनीहरूको एक मात्र अक्सिजन हो, र यो बन्द हुनासाथ यिनीहरूको राजनीतिक मृत्यु निश्चित छ।"

'प्रचण्ड' फेरि निर्णायक: 'ढाडमा टेकेर टाउकोमा हान्ने' पुरानै खेल सुरु !
अचम्म त के छ भने, सधैँ 'तेस्रो शक्ति' मा खुम्चिएर पनि कसरी सत्ताको साँचो गोजीमा हाल्ने भन्ने कलामा माहिर नेपाल कम्युनिस्ट पार्टी (नेकपा) का अध्यक्ष पुष्पकमल दाहाल 'प्रचण्ड' फेरि एकपटक "किङमेकर" बनेर उदाएका छन्।

हिजोसम्म जसलाई 'अस्थिरताको संवाहक' भनेर कांग्रेस र एमाले दुवैले सत्तोसराप गर्थे, आज त्यही प्रचण्डको मूलढोकामा दुवै दलका नेताहरू 'प्रसाद' थाप्न लामबद्ध छन्। कांग्रेस सभापति गगन थापा र प्रचण्डबीच गोप्य मन्त्रणा भइरहेको छ भने अर्कोतर्फ एमाले पनि सुटुक्क बालुवाटार र खुमलटारको फन्को मारिरहेको छ।

प्रचण्ड अहिले मुसुमुसु हाँस्दै दुवैतिर पुलिङ्गी र स्त्रीलिंगी जाल फ्याँकेर भन्दै होलान् "तिमीहरू जतिसुकै ठूलो स्वरले कराए पनि, घुमीफिरी आउने त मेरै दैलोमा हो!"

निष्कर्ष: लाज र घिनको पराकाष्ठा
जनताले 'नो नट अगेन' भन्दै केन्द्रमा नयाँ विकल्प रोजिसके पनि पुराना दलहरूलाई चेत खुलेको छैन। प्रदेशका मुख्यमन्त्री र मन्त्रीहरू जसरी 'हिक्क हिक्क' गर्दै, कुर्सीको खुट्टा समातेर रोइरहेका छन्, यसले संसदीय व्यवस्थाकै बेइज्जत गरिरहेको छ।

आगामी केही दिनभित्रै सातै प्रदेशका सरकारहरू तासको महलझैँ ढल्ने र फेरि नयाँ 'अपवित्र' गठबन्धनको कुरुप अनुहार देखिने निश्चित प्रायः छ।