न्यूज अभियान
हरेक खबर विशेष खबर

काठमाडौं । गायिका कुन्ती मोक्तानको सुमधुर स्वर, शिलाबहादुर मोक्तानको संगीत तथा नारायण खतिवडाको शब्द सिर्जनामा तयार भएको 'खुशी' म्युजिक भिडियोले दर्शकमाझ सकारात्मक चर्चा बटुलिरहेको छ। भिडियोमा कलाकार अमीशा खतिवडाले जीवन्त अभिनयमार्फत ज्येष्ठ नागरिकप्रतिको सम्मान, माया र पारिवारिक जिम्मेवारीको भावपूर्ण सन्देश प्रस्तुत गरेकी छन्।

सामान्य कथावस्तुमा आधारित भए पनि भिडियोले समाज रूपान्तरणको गहिरो सन्देश बोकेको छ। विशेषगरी वृद्ध बाबुआमाप्रति सम्मान, आत्मीय व्यवहार र उनीहरूको मन दुख्ने खालका व्यवहारबाट टाढा रहनुपर्ने विषयलाई मार्मिक ढंगले प्रस्तुत गरिएको छ।

भिडियोले नेपाली समाजमा अझै पनि विद्यमान "छोरा नै चाहिन्छ", "दागबत्ती छोरोले मात्रै दिनुपर्छ" जस्ता परम्परागत सोचलाई चुनौती दिएको छ। यसमा छोरी पनि बाबुआमाको सहारा बन्न सक्छिन्, वृद्धावस्थामा सेवा–सत्कार गर्न सक्छिन्, धार्मिक तथा पारिवारिक संस्कार पूरा गर्न सक्षम हुन्छिन् भन्ने सशक्त सन्देश प्रवाह गरिएको छ।

अमीशा खतिवडाको स्वाभाविक अभिनयले समाजमा लैङ्गिक समानता, पारिवारिक उत्तरदायित्व र मानवीय संवेदनाको महत्वलाई प्रभावकारी रूपमा उजागर गरेको छ। भिडियोले छोरा र छोरी दुवै परिवारका समान रूपमा अमूल्य सदस्य हुन् भन्ने सन्देशलाई आत्मीय ढंगले स्थापित गर्न खोजेको देखिन्छ।

समाजमा समानता, सम्मान र आपसी सद्भावको संस्कार विकास गर्न यस्ता सिर्जनात्मक प्रयासले सकारात्मक भूमिका खेल्ने अपेक्षा गरिएको छ। 'खुशी' म्युजिक भिडियोले मनोरञ्जनसँगै सामाजिक चेतना जगाउने उद्देश्यलाई सफलतापूर्वक प्रस्तुत गरेको छ।