न्यूज अभियान
हरेक खबर विशेष खबर

काठमाडौं । बलिउड अभिनेता टाइगर श्रफ सवार गाडीमा गोली प्रहार हुँदा उनी सुरक्षित रहेका छन् भने उनका चालक र एक रिक्साचालक घाइते भएका छन्।

भारतीय सञ्चारमाध्यमका अनुसार मुम्बईको जुहू क्षेत्रमा आइतबार साँझ उक्त घटना भएको हो। फुटबल खेलेर घर फर्किने क्रममा जुहूस्थित पुष्पा पार्कनजिक श्रफको गाडीलाई लक्षित गरी गोली प्रहार गरिएको थियो।

दुईपाङ्ग्रे सवारीसाधनमा आएका तीन जना अपरिचित व्यक्तिले गोली चलाएर फरार भएको बताइएको छ। गोली प्रहारबाट अभिनेता श्रफलाई कुनै चोटपटक लागेको छैन।

घाइते चालक र रिक्साचालकलाई उपचारका लागि अस्पताल लगिएको छ। घटनापछि मुम्बई प्रहरी घटनास्थलमा पुगेर अनुसन्धानमा जुटेको छ।

प्रहरीको अपराध अनुसन्धान शाखाले घटनास्थल आसपासका निगरानी क्यामेराका दृश्य जाँच गरिरहेको छ। गोली प्रहारमा संलग्न व्यक्तिहरूको पहिचान तथा खोजी कार्य जारी रहेको प्रहरीले जनाएको छ।

घटनाको कारण र आक्रमणकारीको उद्देश्यबारे भने विस्तृत विवरण सार्वजनिक भएको छैन।