न्यूज अभियान
हरेक खबर विशेष खबर

काठमाडौं,  भारतको आन्ध्र प्रदेश र विशाखापट्टनम आसपास प्रभाव पार्ने अनुमान गरिएको चक्रवाती आँधी ‘अर्नब’ को सम्भावित असरलाई मध्यनजर गर्दै नेपाल सरकारले जोखिम न्यूनीकरण, जनधनको सुरक्षा र अत्यावश्यक सेवाको निर्बाध सञ्चालन सुनिश्चित गर्न मातहतका सम्पूर्ण निकायलाई उच्च सतर्कताका साथ तयारी अवस्थामा राखेको छ।

सरकारका अनुसार चक्रवात नेपाल प्रवेश गर्ने समयसम्म कमजोर हुने अनुमान गरिएकाले अत्यधिक तीव्र हावाहुरीको जोखिम कम देखिए पनि देशका विभिन्न क्षेत्रमा वर्षा, उच्च हिमाली क्षेत्रमा हिमपात र केही स्थानमा हावाहुरीको सम्भावना भने कायम रहेको छ। त्यसैले सम्भावित मौसमी जोखिमलाई हल्का रूपमा नलिन र आवश्यक सावधानी अपनाउन सर्वसाधारणलाई आग्रह गरिएको छ।

सम्भावित विपद्बाट नागरिकलाई सुरक्षित राख्न नेपाल प्रहरी, सशस्त्र प्रहरी बल र स्थानीय प्रशासनले विभिन्न स्थानमा माइकिङमार्फत सचेतना अभियान सञ्चालन गरिरहेका छन्। जोखिमयुक्त बस्ती, नदी किनार र पहिरोको सम्भावना रहेका क्षेत्रमा स्थानीयवासीलाई समयमै सतर्क रहन आग्रह गरिएको छ।

पर्यटन क्षेत्रमा पनि विशेष सावधानी अपनाइएको छ। पर्यटन विभाग, नेपाल पर्यटन बोर्ड र नेपाल पर्वतारोहण संघले पदयात्रा तथा पर्वतारोहणमा निस्कनुअघि आधिकारिक मौसम पूर्वानुमान अद्यावधिक गरेर मात्र यात्रा तय गर्न पर्यटक तथा पर्वतारोहण टोलीहरूलाई अनुरोध गरेका छन्। विशेषगरी उच्च हिमाली क्षेत्रमा मौसम अचानक परिवर्तन हुन सक्ने भएकाले अतिरिक्त सतर्कता अपनाउन सुझाव दिइएको छ।

हवाई सुरक्षालाई पनि उच्च प्राथमिकतामा राखिएको छ। नेपाल नागरिक उड्डयन प्राधिकरणले सबै विमानस्थललाई धावनमार्गको नियमित निरीक्षण, हवाई ट्राफिक व्यवस्थापन, वैकल्पिक उडान योजना, सञ्चार प्रणाली र विद्युत् आपूर्तिलाई पूर्ण तयारी अवस्थामा राख्न निर्देशन दिएको छ। खराब मौसमका कारण उडान तालिकामा आवश्यक परे तत्काल व्यवस्थापन गर्न सम्बन्धित निकायलाई तयारी अवस्थामा रहन भनिएको छ।

यसैबीच विभिन्न जिल्ला प्रशासन कार्यालयहरूले पनि आफ्नो क्षेत्रको जोखिम मूल्याङ्कन गरी पूर्वतयारीलाई तीव्र बनाएका छन्। सम्भावित बाढी, पहिरो र अन्य मौसमी जोखिम हुन सक्ने क्षेत्रमा स्थानीय तहसँग समन्वय गरेर आवश्यक सुरक्षा व्यवस्था मिलाइएको जनाइएको छ।

सरकारले नागरिकलाई सामाजिक सञ्जाल वा अन्य माध्यमबाट फैलिने भ्रामक अफवाहको पछि नलाग्न, आधिकारिक निकायबाट जारी हुने सूचना मात्र विश्वास गर्न र मौसम पूर्वानुमानलाई आधार बनाएर यात्रा तथा दैनिक गतिविधि सञ्चालन गर्न विशेष अपिल गरेको छ। विपद्को समयमा समयमै प्राप्त हुने सही सूचना र नागरिकको सजगताले जोखिम न्यूनीकरणमा महत्वपूर्ण भूमिका खेल्ने भएकाले सबैलाई सतर्क र सुरक्षित रहन आग्रह गरिएको छ।