न्यूज अभियान
हरेक खबर विशेष खबर

‘भेला स्थगित भयो’ भन्दै फर्जी सूचना भाइरल, विश्वकर्माको प्रष्टोक्ति– ‘निर्धारित कार्यक्रमअनुसार अघि बढ्छ’

काठमाडौं, २६ साउन । नेपाली कांग्रेसभित्र संस्थापन र संस्थापनइतर पक्षबीचको विवाद चर्किरहेका बेला डा. शशांक कोइरालाको नाम र हस्ताक्षर प्रयोग गरेर राष्ट्रिय भेला स्थगित भएको भन्दै नक्कली वक्तव्य सार्वजनिक भएपछि कांग्रेसको आन्तरिक राजनीति थप तरंगित बनेको छ।

पूर्वसभापति शेरबहादुर देउवा पक्षले काठमाडौंमा आयोजना गर्न लागेको राष्ट्रिय भेला स्थगित भएको दाबी गर्दै सामाजिक सञ्जालमा एउटा वक्तव्य भाइरल भएपछि आयोजक पक्षले त्यसलाई पूर्णतः फर्जी भन्दै खण्डन गरेको हो।

राष्ट्रिय भेलाको मूल आयोजक समितिको संयोजक डा. शशांक कोइराला रहेको अवस्थामा उनको नाम र हस्ताक्षर दुरुपयोग गरेर वक्तव्य निकालिनुले कांग्रेसभित्रको विवाद अब सूचना र प्रचारको मोर्चासम्म पुगेको देखिएको छ।

आयोजक पक्षका अनुसार राष्ट्रिय भेला स्थगित भएको छैन। बरु पूर्वनिर्धारित कार्यक्रमअनुसार भेला सञ्चालन हुने तयारी भइरहेको छ।

कांग्रेस नेता मीन विश्वकर्माले पनि राष्ट्रिय भेला नरोकिएको स्पष्ट पारेका छन्। उनका अनुसार भेला रोकिएको भन्ने सूचना भ्रमपूर्ण हो र तयारी पूर्ववत् रूपमा अघि बढिरहेको छ।

कांग्रेस संस्थापनइतर समूहले यसअघि डा. शशांक कोइरालाको संयोजकत्वमा ५५१ सदस्यीय मूल आयोजक समिति गठन गरेको थियो। भेलालाई व्यवस्थित गर्न ३२ वटा उपसमितिसमेत गठन गरेर तयारी अघि बढाइएको छ।

हस्ताक्षर दुरुपयोग भएपछि प्रश्न उठ्यो—नक्कली वक्तव्य कसले निकाल्यो ?
शशांक कोइरालाको नाममा वक्तव्य सार्वजनिक भएपछि कांग्रेसभित्र स्वाभाविक रूपमा प्रश्न उठेको छ—आयोजक समितिका संयोजककै हस्ताक्षर नक्कली बनाएर वक्तव्य निकाल्ने व्यक्ति वा समूह को हो ?

भेला स्थगित भएको गलत सूचना सामाजिक सञ्जालमा फैलिनुले कांग्रेसभित्रको राजनीतिक संघर्ष अब संगठन र नेतृत्वको विवादमा मात्र सीमित नरहेको देखाएको छ। सूचना, भ्रम र सामाजिक सञ्जालको प्रयोगमार्फत पनि एकअर्कालाई कमजोर पार्ने प्रयास भइरहेको कांग्रेस नेताहरूको बुझाइ छ।

यद्यपि, उक्त नक्कली वक्तव्य कसले तयार गरी सार्वजनिक गर्‍यो भन्ने विषयमा आयोजक पक्षबाट तत्काल कुनै व्यक्तिको नाम सार्वजनिक गरिएको छैन।

देउवा पक्षको शक्ति प्रदर्शनको तयारी
पूर्वसभापति शेरबहादुर देउवा पक्षले साउन २९ देखि ३१ गतेसम्म काठमाडौंमा राष्ट्रिय भेला आयोजना गर्ने तयारी गरेको छ। भेलामा देउवा स्वयं सहभागी भएर सम्बोधन गर्ने तयारी रहेको यसअघि नै सार्वजनिक भइसकेको छ।

देउवा पक्षले विशेष महाधिवेशनबाट आएको नेतृत्वको वैधानिकतामाथि प्रश्न उठाउँदै समानान्तर राजनीतिक गतिविधि अघि बढाइरहेको छ। अर्कोतर्फ संस्थापन पक्षले नियमित महाधिवेशनको प्रक्रिया अघि बढाइरहेको अवस्थामा कांग्रेसभित्र दुई धारबीचको संघर्ष थप जटिल बन्दै गएको छ।

यही पृष्ठभूमिमा हुन लागेको राष्ट्रिय भेलालाई देउवा पक्षले आफ्नो राजनीतिक शक्ति र आगामी रणनीति सार्वजनिक गर्ने महत्वपूर्ण मञ्चका रूपमा लिएको छ।

भेला विभाजनका लागि होइन : शशांकको दाबी
राष्ट्रिय भेलाको संयोजकको जिम्मेवारी पाएका डा. शशांक कोइरालाले यसअघि नै भेला पार्टी विभाजनका लागि नभई कांग्रेसलाई एकताबद्ध र रूपान्तरण गर्ने उद्देश्यमा केन्द्रित रहेको बताएका थिए। उनले भेलालाई विचार, मूल्य, विधि र कांग्रेसको भविष्यबारे साझा छलफलको अभियानका रूपमा व्याख्या गरेका छन्।

तर कांग्रेसको वर्तमान शक्ति संघर्षको पृष्ठभूमिमा राष्ट्रिय भेलाको राजनीतिक अर्थ भने त्यतिमै सीमित छैन। विशेष महाधिवेशन, नेतृत्वको वैधानिकता, आगामी महाधिवेशन र सम्भावित राजनीतिक ध्रुवीकरणका विषयले भेलालाई कांग्रेसको भविष्यको शक्ति समीकरणसँग प्रत्यक्ष जोडेको छ।

नक्कली वक्तव्यले कांग्रेसभित्रको अविश्वास झनै बढायो
एउटै पार्टीभित्र एउटै घटनाबारे फरक–फरक सूचना सार्वजनिक हुन थालेपछि कांग्रेस कार्यकर्तामा अन्योल बढ्नु स्वाभाविक हो। त्यसमा पनि पार्टीको राष्ट्रिय भेलाजस्तो महत्वपूर्ण राजनीतिक कार्यक्रम स्थगित भएको भन्दै आयोजककै संयोजकको नाममा नक्कली वक्तव्य आउनुले घटनालाई सामान्य ‘सोसल मिडिया फेक न्युज’ मात्र भनेर पन्छाउन मिल्ने अवस्था छैन।

यसले कांग्रेसभित्र फैलिएको अविश्वास, आशंका र शक्ति संघर्षको गहिराइसमेत उजागर गरेको छ। अहिलेको मुख्य प्रश्न भने स्पष्ट छ—शशांक कोइरालाको नाम र हस्ताक्षर दुरुपयोग गरेर राष्ट्रिय भेला रोकिएको भ्रम फैलाउने प्रयास कसले गर्‍यो ?

भेला नरोकिएको स्पष्ट भइसके पनि फर्जी वक्तव्यको स्रोत र उद्देश्य सार्वजनिक हुन बाँकी छ। कांग्रेसभित्रको विवाद उत्कर्षमा पुगेका बेला यस्तो गतिविधि हुनु आफैंमा गम्भीर राजनीतिक प्रश्न बनेको छ।

राष्ट्रिय भेला निर्धारित मितिमा हुने आयोजक पक्षको प्रष्टोक्तिसँगै तत्कालका लागि भ्रम चिरिएको छ। तर फर्जी वक्तव्यको वास्तविक लेखक र उद्देश्य सार्वजनिक नभएसम्म कांग्रेसभित्रको ‘सूचना युद्ध’ भने समाप्त भएको मान्न सकिँदैन।