अध्यक्ष दाहालसँग प्रमुख निर्वाचन आयुक्तको भेट
काठमाडौँ, २७ साउनः राष्ट्रिय सभाका अध्यक्ष नारायणप्रसाद दाहालसँग प्रमुख निर्वाचन आयुक्त मानबहादुर कार्की र निर्वाचन आयुक्तद्वय गुरुप्रसाद वाग्ले र डा राजीव सुब्बाले भेट गर्नुभएको छ ।
नवनियुक्त प्रमुख निर्वाचन आयुक्त र आयुक्तलाई अध्यक्ष दाहालले बधाई ज्ञापन गर्नुका साथै कार्यकाल सफलता शुभकामना दिनुभएको थियो ।
सो अवसरमा अध्यक्ष दाहालले निर्वाचन आयोगको जिम्मेवारी निष्पक्ष, सन्तुलित र प्रभावकारी रुपमा पूरा गर्न सफल हुनेमा आफू विश्वस्त रहेको बताउनुभयो ।
साथै राष्ट्रिय सभामा सुदूरपश्चिम प्रदेशबाट प्रतिनिधित्व गर्ने एक सदस्य खाली रहेको स्मरण गराउँदै अध्यक्ष दाहालले सरकारलगायत अन्य पक्षसँग समन्वय गरी निर्वाचनको प्रक्रिया अगाडि बढाउन आग्रह गर्नुभएको थियो ।
भेटमा प्रमुख निर्वाचन आयुक्त कार्कीले संविधान, ऐन कानुनको अधीनमा रही आफूले निर्वाचन आयोगको जिम्मेवारी पूरा गर्न कुनै कसर बाँकी नराख्ने बताउनुभएको थियो ।
