गौरमा स्थानीय अगुवालाई विपद् जोखिम न्यूनीकरणसम्बन्धी प्रशिक्षण
गौर, २१ असोजः विपद्को समयमा गरिने उद्धार, राहत वितरण तथा खोज कार्यमा स्थानीय तह, नागरिक समाज र सुरक्षा निकायबीच समन्वयसहित सहकार्य हुनुपर्नेमा जोड दिइएको छ ।
गौर नगरपालिकाद्वारा यहाँ आयोजित ‘स्थानीयस्तरमा विपद् जोखिम न्यूनीकरण तथा व्यवस्थापनसम्बन्धी प्रशिक्षण’मा सहभागी वक्ताले व्यावहारिक तथा सैद्धान्तिक ज्ञानसहित समुदायस्तरमा सचेतना जगाउनुपर्ने खाँचो औँल्याउनुभयो ।
कार्यक्रममा गौर नगरपालिकाका प्रमुख शम्भु साहले जुनसुकै समयमा विपद्को सामना गर्नुपर्ने यथार्थलाई दृष्टिगत गरी जोखिम न्यूनीकरण तथा नियन्त्रण र पूर्वतयारीलाई समुदायस्तरमा विस्तार गर्नुपर्ने बताउनुभयो । विपद्सम्बन्धी सचेतना जगाउने उद्देश्यले कार्यक्रम आयोजना गरिएको उहाँको भनाइ छ ।
बाढी, डुबान, आगलागी, हुरी, भूकम्पजस्ता विपद्जन्य घटनाबाट तराई क्षेत्र प्रभावित हुने गरेको उल्लेख गर्दै उहाँले त्यसबाट हुने जनधनको क्षति न्यूनीकरण तथा व्यवस्थापनमा हरेक व्यक्ति, परिवार तथा समाज सचेत हुनुपर्ने धारणा व्यक्त गर्नुभयो ।
सशस्त्र प्रहरी बल गौरका प्रहरी नायब उपरीक्षक दुर्गा भट्टले मुलुकको विशिष्ट भूगोल र मौसमका कारण बर्सेनि हुने गरेको जनधनको क्षति न्यूनीकरण तथा रोकथामका लागि व्यावहारिक तथा सैद्धान्तिक प्रशिक्षणसहित समुदायलाई सचेत गराउनुपर्ने बताउनुभयो ।
यसैगरी, गौर नगरपालिकाका शिक्षा शाखा प्रमुख सुजन पौडेल, विपद् व्यवस्थापन शाखा प्रमुख रोशनीकुमारी श्रेष्ठले विद्यालयस्तरीय पाठ्यक्रममा विपद्सँग सम्बन्धित विषयलाई समेट्नुपर्नेमा जोड दिनुभयो ।
यस्तै, महिलालाई विपद् जोखिम न्यूनीकरणसम्बन्धी तालिमको थप व्यवस्था गर्नुपर्ने आवश्यकता औँल्याइएको थियो ।
कार्यक्रमका सहभागीले तालिमबाट प्राप्त ज्ञान र सीपले विपद् जोखिम नियन्त्रण तथा न्यूनीकरणमा सघाउ पुर्याउने विश्वास व्यक्त गर्नुभयो । एकदिने सो प्रशिक्षण कार्यक्रममा गौर नगरपालिकाका नौ वटै वडाका ४५ जना स्थानीय अगुवा महिला स्वयम्सेविका सहभागी हुनुहन्थ्यो ।
