न्यूज अभियान
हरेक खबर विशेष खबर

इजरायलमा सम्पन्न संसदीय निर्वाचनपछि वैकल्पिक सरकार गठन गर्ने विषयमा अरब नेतृत्वका राजनीतिक दलहरूको गठबन्धनले प्रधानमन्त्री बेन्जामिन नेतान्याहूविरोधी समूहसँग वार्ता गरिरहेको वरिष्ठ अरब सांसद अहमद तिबीले बुधबार बताउनुभएको छ ।
    इजरायलमा अरब समुदायको प्रतिनिधित्व गर्ने ताल बालाद र हदाश दलहरू सम्मिलित गठबन्धन ‘जोइन्ट लिस्ट’ ले नेतान्याहूलाई सत्ताबाट हटाउने प्रयासमा विपक्षी गठबन्धनलाई सहयोग गर्ने सम्भावना रहेको तिबीले बताउनुभयो ।
    इजरायली सरकारी रेडियो ‘कान रेशेत बेट’ सँगको अन्तर्वार्तामा ताल पार्टीका अध्यक्षसमेत रहनुभएका तिबीले नेतान्याहूलाई विस्थापित गर्न गठित विपक्षी समूहलाई आफ्नो गठबन्धनले समर्थन गर्न सक्ने बताउनुभयो । यद्यपि, जोइन्ट लिस्ट औपचारिक रूपमा सरकारमा सहभागी हुने सम्भावना कम रहेको उहाँले स्पष्ट पार्नुभयो ।
“हामीले नेतान्याहूलाई सरकार गठन गर्नबाट रोकेका छौँ । हाम्रा मतदाताहरू चाहन्छन् कि हामी अझ अघि बढौँ र निर्वाचनपछिको राजनीतिक प्रणालीको स्वरूपमा प्रभाव पारौँ,” तिबीले भन्नुभयो ।
    उहाँका अनुसार, अरब अल्पसङ्ख्यक समुदायसँग सम्बन्धित अपराध नियन्त्रण, घर भत्काउने कार्य रोक्ने, पूर्वाधार विकास र घृणाजन्य गतिविधि नियन्त्रणजस्ता विषयमा प्रगति हुने सुनिश्चित भएमा जोइन्ट लिस्ट संसदीय सहकार्यका विषयमा छलफल गर्न तयार छ ।

    “हामी सायद यस सरकारको अभिन्न अङ्ग बन्ने छैनौँ,” उहाँले भन्नुभयो ।  यद्यपि, अन्य प्रकारका सहकार्यका विकल्प खुला रहेको उहाँको भनाइ थियो ।
    यसैबीच, विपक्षी गठबन्धनमा आबद्ध डेमोक्र्याट्स पार्टीका नेता यायर गोलानले अरब दलहरूसँग सहकार्य गर्न अस्वीकार गर्ने अडान त्याग्न आफ्ना सहयोगीहरूलाई आग्रह गर्नुभएको छ । 
    सामाजिक सञ्जाल एक्समा उहाँले नेतान्याहूले यहुदी र अरब मतदाताबीच सिर्जना गरेको विभाजनलाई स्वीकार गर्न नहुने बताउनुभएको छ । 
    जोइन्ट लिस्टका अध्यक्ष युसेफ जबारिनले पनि नेतान्याहूलाई सत्ताबाट हटाउन विपक्षी नेता गादी आइजेनकोटलाई सहयोग गर्न आफूहरू तयार रहेको बताउनुभएको छ ।
    “नेतान्याहूको रक्तपातपूर्ण सरकारको वास्तविक विकल्प दिन चाहने जोकोहीले हामीसँग कुरा गर्नैपर्छ । हामी उहाँलाई सत्ताबाट हटाउने बाटो खोल्न तयार छौँ,” जबारिनले विज्ञप्तिमा भन्नुभएको छ ।
    निर्वाचनपछिको मतगणना जारी रहँदा सार्वजनिक प्रारम्भिक अनुमानअनुसार, न त नेतान्याहूको दक्षिणपन्थी गठबन्धनले न त पूर्वसैन्य प्रमुख आइजेनकोटको नेतृत्वमा रहेको विपक्षी गठबन्धनले नै सरकार गठनका लागि आवश्यक संसदीय बहुमत हासिल गर्ने अवस्था देखिएको थियो ।
    इजरायलको केन्द्रीय निर्वाचन समितिका अनुसार, करिब ७७ प्रतिशत मत गणना हुँदा १२० सदस्यीय संसदमा नेतान्याहूको गठबन्धनले ५४ सिट र आइजेनकोटको गठबन्धनले ४९ सिट जित्ने अनुमान गरिएको थियो । जोइन्ट लिस्ट र मुस्लिम राआम पार्टीले संयुक्त रूपमा १७ सिट जित्ने अनुमान गरिएकामा ११ सिट जोइन्ट लिस्टको भागमा पर्ने देखिएको थियो ।
    यस अवस्थामा जोइन्ट लिस्टले सरकार गठनमा निर्णायक भूमिका खेल्न सक्ने देखिएको छ । गठबन्धनमा औपचारिक रूपमा सहभागी नभई संसदीय समर्थन दिएर पनि उसले सरकार गठनको समीकरण प्रभावित पार्न सक्छ ।
    यद्यपि, नेतान्याहू र आइजेनकोट दुवैले यसअघि अरब दलहरूसँग मिलेर सरकार गठन गर्ने सम्भावनालाई अस्वीकार गरेका थिए । यसले निर्वाचनपछि बहुमत जुटाउने प्रयासलाई थप जटिल बनाएको छ ।