न्यूज अभियान
हरेक खबर विशेष खबर

काठमाडौँ, २४ (रासस) : राष्ट्रिय फोटो पत्रकार समूह नेपाल (एनएफपिजे) को २९औँ वार्षिक साधारणसभाले फोटो पत्रकारिताको व्यावसायिक विकास, पेसागत सुरक्षा, तस्बिरको प्रतिलिपि अधिकार संरक्षण तथा फोटोको रोयल्टी सुनिश्चित गर्न पहल गर्नुपर्नेमा जोड दिएको छ । आज यहाँ सम्पन्न साधारणसभाले संस्थालाई आर्थिकरूपमा आत्मनिर्भर बनाउँदै फोटो पत्रकारको हकहित संरक्षण र क्षमता अभिवृद्धिका कार्यक्रमलाई प्राथमिकता दिनुपर्ने निष्कर्ष निकालेको हो ।

साधारणसभामा अध्यक्ष प्रदीपराज वन्तले प्रस्तुत गरेको अध्यक्षीय प्रतिवेदनमा फोटो पत्रकारिताको व्यावसायिक विकाससँगै पेसागत सुरक्षा, तस्बिरको उचित मूल्य, प्रतिलिपि अधिकारको संरक्षण र ऐतिहासिक तस्बिरको अभिलेखीकरणलाई प्रमुख मुद्दाका रूपमा उठाइएको छ । साधारणसभामा सहभागी पूर्वअध्यक्ष मीनरत्न बज्राचार्यले फोटो पत्रकारिताको व्यावसायिक विकाससँगै तस्बिरको संरक्षण र उचित प्रयोगमा ध्यान दिनुपर्ने बताउनुभयो । फोटो पत्रकारिताका विद्यमान चुनौती सामना गर्न संस्थागत पहल आवश्यक रहेको उहाँको भनाइ थियो । 

राष्ट्रिय फोटो पत्रकार समूह नेपालका विकास रौनियारले कृत्रिम बौद्धिकता (एआई) को प्रयोग बढिरहेको अवस्थामा फोटो पत्रकारितामा यसको प्रयोग गर्दा सावधानी अपनाउनुपर्ने धारणा राख्नुभयो । साधारणसभामा महासचिव घनश्याम श्रेष्ठले आर्थिक वर्ष २०८२/८३ को प्रगति प्रतिवेदन प्रस्तुत गर्नुहुँदै सङ्गठन विस्तार, क्षमता अभिवृद्धि, अन्तरराष्ट्रिय सहकार्य तथा फोटो पत्रकारहरूको पेसागत हकहित संरक्षणका क्षेत्रमा भएका गतिविधिबारे जानकारी गराउनुभयो ।  

फोटो पत्रकार सम्मानित

साधारणसभाको अवसरमा ‘हरिगोपाल प्रधान फोटो पत्रकारिता सम्मान’ पाँच विधामा प्रदान गरिएको छ । साहसिक विधामा अनुप प्रधान, पर्यावरण–पर्यटन विधामा तनहुँका सागर गिरी, मनोरञ्जन विधामा वद्री थापा, सांस्कृतिक विधामा प्रकाश गोपाली र खेलकुद विधामा पोखराका वसन्त शेर्पा सम्मानित हुनुभएको छ ।

पूर्वसशस्त्र प्रहरी नायब महानिरीक्षक माधव थापाद्वारा स्थापित ‘माधव थापा जोखिमपूर्ण फोटो पत्रकारिता पुरस्कार–२०८३’ हरिश सिंह नगाललाई नगद रु पाँच हजारसहित प्रदान गरिएको छ । ‘एनएफपिजे प्रेसिडेन्ट अवार्ड–२०८३’ संस्थाका सदस्य रामशरण महर्जन ‘अजय’लाई प्रदान गरिएको छ भने उत्कृष्ट शाखाका रूपमा रामेछाप शाखालाई सम्मान गरिएको छ ।

अन्तरराष्ट्रिय फोटोग्राफी समिट

अध्यक्ष वन्तले आगामी वैशाख १३ गते नेपालमा अन्तरराष्ट्रिय फोटोग्राफी समिट आयोजना गर्ने घोषणा गर्नुभएको छ । समिटमा विश्वका विभिन्न देश तथा एसियाबाट करिब १०० जना फोटो पत्रकार र फोटोग्राफरलाई आमन्त्रण गर्ने लक्ष्य राखिएको उहाँले जानकारी दिनुभयो ।

विश्व फोटोग्राफी तथा फोटो पत्रकारितामार्फत नेपालको पर्यटन प्रवर्द्धन गर्नु समिटको मुख्य उद्देश्य रहेको उहाँले बताउनुभयो । नेपालको हिमाल, वनजंगल, वातावरण, वन्यजन्तु तथा सांस्कृतिक सम्पदालाई अन्तरराष्ट्रियस्तरमा प्रचारप्रसार गर्ने लक्ष्यसमेत समिटले राखेको छ ।