न्यूज अभियान
हरेक खबर विशेष खबर

फ्रान्स सरकारले १५ वर्षमुनिका बालबालिकालाई सामाजिक सञ्जाल प्रयोगमा रोक लगाउने नयाँ कानूनी प्रस्ताव अघि बढाएको छ । राष्ट्रपति इमानुएल म्याक्रोनले सोमबार सरकारले परिमार्जित मस्यौदा युरोपेली आयोगलाई जानकारी गराएको बताउनुभयो । यसअघि ल्याइएको कानूनलाई संवैधानिक परिषद्ले खारेज गरेपछि सरकारले नयाँ प्रस्ताव तयार गरेको हो ।

    म्याक्रोनले सामाजिक सञ्जालको प्रयोगबाट बालबालिका तथा किशोरकिशोरीमा पर्न सक्ने नकारात्मक प्रभाव रोक्न यसलाई आफ्नो प्रमुख प्राथमिकतामध्ये एक बनाउनुभएको छ । उहाँले आगामी वर्ष राष्ट्रपतिको कार्यकाल सकिनुअघि नै प्रतिबन्ध लागू हुने अपेक्षा व्यक्त गर्नुभएको छ ।

    फ्रान्सको संवैधानिक परिषद्ले गत अगस्टमा अघिल्लो कानूनका केही प्रावधानले व्यक्तिको अभिव्यक्ति स्वतन्त्रतामा आवश्यकताभन्दा बढी हस्तक्षेप गरेको ठहर गर्दै त्यसलाई खारेज गरेको थियो । त्यसपछि सरकारले कानूनी तथा प्राविधिक सुधारसहित नयाँ मस्यौदा अघि बढाएको हो ।

    म्याक्रोनले युरोपेली सङ्घ (इयु) का अन्य सदस्य राष्ट्रमा पनि बालबालिकालाई सामाजिक सञ्जालबाट जोगाउने समान व्यवस्था लागू गर्न आग्रह गर्दै आउनुभएको छ । नयाँ प्रस्ताव युरोपेली सङ्घ (इयु) को कानूनअनुकूल भए–नभएको सुनिश्चित गर्न आयोगलाई जानकारी गराइएको हो ।

    युरोपेली आयोगकी अध्यक्ष उर्सुला भोन डेर लेयनले यसै साता ब्रसेल्समा हुने सम्बोधनमा बालबालिकाका लागि युरोपेली सङ्घ (इयु) भर सामाजिक सञ्जालमा सम्भावित प्रतिबन्धबारे धारणा सार्वजनिक गर्ने अपेक्षा गरिएको छ । बालबालिकामा सामाजिक सञ्जालको नकारात्मक प्रभावबारे चिन्ता बढिरहेका बेला विभिन्न देशले यसको पहुँच सीमित गर्ने कदम चालिरहेका छन् ।