न्यूज अभियान
हरेक खबर विशेष खबर

गोरखा, २५ असोजः बूढीगण्डकी नदीमा आएको बाढीमा परेर अलपत्र परेकाहरूको हेलिकोप्टरमार्फत उद्धार गरिएको छ । चुमनुब्री गाउँपालिका-३ न्याकफेदीमा फसेका नौ जनालाई हेलिकोप्टरमार्फत उद्धार गरेर न्याकगाउँ लगिएको गोरखाका सहायक प्रमुख जिल्ला अधिकारी नेत्रप्रशाद शर्माले जानकारी दिनुभयो । 

उहाँका अनुसार धार्चे गाउँपालिका-१ यारुबगरमा फसेका एक विदेशी नागरिकसहित १८ जनाको पनि हेलिकोप्टरमार्फत उद्धार गरिएको छ ।

यारुबगरमा फसेका पर्यटक, स्थानीय र हाइड्रोपावरमा कार्यरत १८ जनालाई उद्धार गरी हुल्चुक गाउँमा लगिएको सहायक प्रजिअ शर्माले जानकारी दिनुभयो । बाढी प्रभावित क्षेत्र गोरखाको चुमनुब्री, धार्चे र आरुघाट गाउँपालिकामा सेनाको चार वटा हेलिकोप्टर परिचालन गरिएको उहाँले बताउनुभयो ।
    
सहायक प्रजिअ शर्माका अनुसार आज बिहान उत्तरी गोरखाको चुमनुब्री गाउँपालिका-६ उङ्गिलुङ खोलाबाट बूढीगण्डकीमा आएको बाढीले हालसम्म दुई मोटरेबल पुल र चार वटा झोलुङ्गे पुल बगाएको छ ।

बाढीले चुमनुब्री गाउँपालिकाको उङ्गिलुङ खोला क्षेत्रका चार वटा गोठ बगाएका छन् । यस्तै, बूढीगण्डकी किनारमा पर्ने सल्लेरी, घट्टेखोला, पैँयु, दोभान र बगरका करिब ५० घरमा क्षति पुर्‍याएको उहाँले जानकारी दिनुभयो ।

शर्माका अनुसार धार्चे गाउँपालिकाको माछिखोला, यारुबगर र दोभानका करिब ३५ घर र आरुघाट गाउँपालिकाको सोतीका करिब १५ घरमा क्षति पुगेको छ । बाढीका कारण उङ्गिलुङ गोठमा बस्ने पाँच जना र धाउनेमा बस्ने तीन घरका पाँच जना गरी १० जना सम्पर्कविहीन बनेका सहायक प्रजिअ शर्माले जानकारी दिनुभयो ।