सवारी दुर्घटनामा दुई जनाको मृत्यु
काठमाडौं, २ भदौ : मकवानपुर, भीमफेदी गाउँपालिका-६ जुरीखेलमा काठमाडौंबाट वीरगंजतर्फ जाँदै गरेको प्रदेश ३-०१-००२ झ ५१८३ नम्बरको स्कारपियो गाडी अनियन्त्रित भई मंगलबार बिहान दुर्घटना हुँदा गाडीमा सवार बैतडी दशरथचन्द नगरपालिका-७ घर भएकी ४९ वर्षीया लक्ष्मी बडुको मृत्यु भएको छ ।
दुर्घटनामा गम्भीर घाइतरे भएकी उनको छाउनी अस्पताल काठमाडौंमा उपचारको क्रममा मृत्यु भएको हो ।
साथै दुर्घटनामा घाइते भएकामध्ये २ जनाको हेटौंडा अस्पतालमा र ३ जनाको छाउनी अस्पताल काठमाडौंमा उपचार भइरहेको छ ।
मुस्ताङ, घरपझोङ गाउँपालिका-४ पुच्छरढोङस्थित सडकमा जोमसोमबाट मुक्तिनाथतर्फ जाँदै गरेको बा.प्र.०१-००४ क २७०१ नम्बरको टिपरको ढालाबाट खसेर रोल्पा लुङग्री गाउँपालिका-३ बस्ने २३ वर्षीय हरि बहादुर पुनको मंगलबार बिहान मृत्यु भएको छ ।
दुर्घटनामा गम्भीर घाइते भएका उनको प्रदेश अस्पताल जोमसोममा उपचारको क्रममा मृत्यु भएको हो ।
टिपर चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
