न्यूज अभियान
हरेक खबर विशेष खबर

मेक्सिको सिटी, ७ भदौ : अमेरिकामा लागुऔषध तस्करीसम्बन्धी आरोपमा खोजीमा रहेका मेक्सिकोको सिनालोआ राज्यका गभर्नर रुबेन रोचा मोया पदमा फर्किएको एक दिनमै पुनः बिदामा बस्ने घोषणा गर्नुभएको छ ।

रोचाले शनिबार राज्य काङ्ग्रेसलाई ३० दिनभन्दा बढी अवधिका लागि अनिश्चितकालीन अस्थायी बिदा स्वीकृत गर्न आग्रह गर्दै सामाजिक सञ्जाल एक्समा पत्र सार्वजनिक गर्नुभएको हो ।

उहाँले शुक्रबार मात्रै सिनालोआको नेतृत्व पुनः सम्हालेको घोषणा गर्नुभएको थियो । मेक्सिकन अभियोजकहरूले अनुसन्धान अघि बढाएपछि उहाँले यसअघि मे महिनामा पदबाट अस्थायी रूपमा अलग हुनुभएको थियो । 

रोचाको पुनरागमनको घोषणाप्रति राष्ट्रपति क्लाउडिया शेनबाउमले शनिबार असन्तुष्टि जनाउनुभयो । उहाँले कसैको पनि व्यक्तिगत स्वार्थलाई जनताको हितभन्दा माथि राख्न नहुने बताउनुभयो ।

पत्रकारहरूले रोचाको विषयमा सोध्दा शेनबाउमले आफूले उहाँको सामाजिक सञ्जालको पोस्टबाट मात्रै पदमा फर्किएको जानकारी पाएको जानकारी दिनुभयो ।

अमेरिकी न्याय विभागले अप्रिलमा रोचासहित सत्तारूढ मोरेना पार्टीका नौ अधिकारीविरुद्ध अमेरिकामा लागुऔषध वितरण गर्न सिनालोआ कार्टेलसँग सहकार्य गरेको आरोप लगाउँदै उनीहरूलाई सुपुर्दगी गर्न माग गरेको थियो । अमेरिकाले बहालवाला मेक्सिकन राजनीतिज्ञविरुद्ध सार्वजनिक रूपमा आरोप लगाएको यो पहिलो घटना भएको बताइएको छ ।

रोचाले शुक्रबार आफूले कुनै अपराध नगरेको दाबी गर्दै स्पष्ट विवेकका साथ पदमा फर्किएको बताउनुभएको थियो । ७७ वर्षीय रोचा राष्ट्रपति शेनबाउमको सत्तारूढ मोरेना पार्टीसँग आबद्ध हुनुहुन्छ र पूर्वराष्ट्रपति एन्ड्रेस म्यानुएल लोपेज ओब्राडोरका निकट सहयोगी मानिन्छन् ।

अमेरिकी राष्ट्रपति डोनाल्ड ट्रम्पले लागुऔषध नियन्त्रणका लागि मेक्सिकोलाई थप कडा कदम चाल्न दबाब दिँदै आउनुभएको छ ।

उहाँले मेक्सिकोमा लागुऔषध तस्करीसँग सम्बन्धित राजनीतिज्ञको प्रभाव रहेको दाबी गर्दै सैन्य सहयोगको प्रस्तावसमेत गर्नुभएको छ । शेनबाउमले भने यस्तो हस्तक्षेप अस्वीकार गर्दै आउनुभएको छ ।