न्यूज अभियान
हरेक खबर विशेष खबर

महेन्द्रनगर, ८ भदौः शिवाङ्गी दुबे कुस्ती खेलमा नेपालको प्रतिनिधत्व गर्ने खेलाडी हुन् । 

दुबेले लगातार दुई पटक एसियाली खेलकुद (एसियाड) प्रतियोगितामा सहभागिता जनाइसक्नुभएको छ । दक्षिण एसियाली खेलकुद (साग) मा रजत पदक जितिसकेकी शिवाङ्गी आसन्न जापानमा आयोजना हुने आगामी २०औँ एसियाली खेलकुद (एसियाड) मा कुस्तीमा पदक जित्ने आशालाग्दी खेलाडी हुनुहुन्छ । 

“उहाँ मेहनती खेलाडी हुन् । त्यसैले दोस्रो पटक एसियाडमा प्रतिस्पर्धा गर्दै छिन् ।” कुस्ती प्रशिक्षक राजेन्द्रबहादुर चन्दले भन्नुभयो, “१९औँ एसियालीमा सहभागिता मात्रै भए पनि आसन्न प्रतियोगितामा भने शिवाङ्गीले पदक ल्याउने सम्भावना  छ ।”

विगत १ महिनादेखि अयोध्यामा प्रशिक्षणमा रहेको नेपाली कुस्ती टोलीमा चार पुरुष र दुई महिला खेलाडी प्रशिक्षण गरिरहनुभएको छ । कञ्चनपुरबाट कुस्ती खेल थालेकी शिवाङ्गी हाल नेपाली सेनाको त्रिभुवन आर्मी क्लबसित आबद्ध हुनुहुन्छ ।

शिवाङ्गीसँगै ६२ किलो तौल समूहमा नेपालगञ्जकी सुशीला चन्द पनि आसन्न एसियाडमा सहभागी हुँदै छिन् । पछिल्लो केही वर्षयता नेपाली कुस्तीमा सुदूरपश्चिमका महिला खेलाडीहरुको वर्चस्व रहेपछि खेलाडी विभागीय टोलीमा आबद्ध हुने क्रम चलिरहेको प्रशिक्षक चन्दको भनाइ छ । कञ्चनपुरबाट आसन्न एसियाडमा चार जना महिला खेलाडी सहभागी छन् । १९औँ एसियाडमा काष्य पदक नेपालले जित्दा महिला कबड्डीमा छ जना खेलाडी कञ्चनपुरका थिए । आसन्न एसियाडमा मानमती विष्ट, रविना चौधरी, जयन्ती बडू र मनिषा जोशी महिला कबड्डी टोलीमा छन् । 

कबड्डीका  प्रशिक्षक विष्णुदत्त भट्टले मनिषाबाहेक अन्य तीन खेलाडी यसअघिको एसियाडमा सहभागी भइसकेको बताउनुभयो । कबड्डी खेलाडी मानमती कञ्चनपुरको भीमदत्त नगरपालिका, मनिषा शुक्लाफाँटा नगरपालिका, रविना बेल्डाडी गाउँपालिका र जयन्ती बेदकोट नगरपालिकाका बासिन्दा हुन् । 

“अहिले सहभागी सबै खेलाडी कञ्चनपुरमा आठ÷नौ वर्षअघि उत्पादन भएका प्रतिभावान खेलाडी हुन्”, प्रशिक्षक भट्टले भन्नुभयो, “नेपाली कबड्डीमा कञ्चनपुरको लामो इतिहास र ठूलो योगदान छ ।